eldiario.es

9

GALICIA

Feijóo e o mago Houdini

Unha vez máis, Feijóo aproveitou a circunstancia para presentarse como o campión da saúde cando Galicia sofre dende hai anos un grave proceso de desmantelamento da sanidade pública no que se están a reducir camas, médicos e investimento

Cabecera de la manifestación en las calles de Vigo

Cabecera de una manifestación por la sanidad pública en 2016 en las calles de Vigo. CIG

O circo da política española está a piques de ofrecer un novo espectáculo que parece sacado dos mellores tempos do famoso mago Houdini, o máis grande escapista da historia. Se as enquisas non se trabucan, ou a oposición é quen de darlles a volta en dúas semanas, Alberto Núñez Feijóo emerxerá de novo dende o Noroeste como a gran esperanza branca da dereita española.

As crónicas madrileñas e as galegas máis afíns á Xunta falan do líder que salvou a Galicia do coronavirus; do político moderado e centrista, alonxado do Casado dos “Cayetanos” e azoute de Vox que goberna unha Arcadia feliz na que nunca pasa nada.

E evidente que Feijóo é un dos políticos máis hábiles do panorama nacional, pero a súa imaxe e a da súa xestión forman parte do realismo máxico que tanto nos gusta os galegos e que o presidente da Xunta vai labrando gracias ao férreo control mediático, público e privado, como ben saben os compañeiros de Defende a Galega, que levan 110 venres vestíndose de loito.

Ata o ministro Ábalos eloxiou estes días o labor da Xunta ante a pandemia e está claro que, comparado con Ayuso, Feijóo ten manexado sen grandes atrancos unha xestión que podería terse complicado moito polo gran envellecemento da poboación en Galicia e pola deficitaria situación da sanidade galega.

Pero o certo é que, por sorte, Galicia superou mellor que outras comunidades a primeira ondada da COVID porque foi unha das zonas máis beneficiadas polo estado de alarma e a prohibición de movementos a mediados de marzo, cando o virus apenas chegara ao noroeste español. O confinamento evitou males maiores e todos o celebramos.

Unha vez máis, Feijóo aproveitou a circunstancia para presentarse como o campión da saúde cando Galicia sofre dende hai anos un grave proceso de desmantelamento da sanidade pública no que se están a reducir camas, médicos e investimento.

E así, por arte de maxia parecen terse esquecido as tres folgas sanitarias que se viviron aínda o ano pasado en atención primaria; onde os médicos teñen que atender a 50 o 60 doentes o día. Esquecéronse tamén as dimisións en cadea de máis de 20 xefes dos centros de saúde de Vigo, as interminables listas de agarda para que te vexa un especialista, o intento frustrado pola presión social de pechar o paridoiro de Verín ou a porcentaxe de eventuais entre o personal sanitario que chega nalgún hospital o 65%, como denunciaron os profesionais este sábado en Compostela. 

E o máis sorprendente. Esquécese que o maior hospital de Galicia, o Álvaro Cunqueiro de Vigo é na práctica un hospital privado, propiedade dun consorcio de empresas, incluido un fondo de inversión de Luxemburgo, que o que quere é gañar cartos. Iso si, a xerencia e os médicos son do Sergas, que paga un canon millonario por usalo. Fala ti logo do modelo Alzira e de Esperanza Aguirre.

Un novo truco de Feijóo que privatiza sen que se note mentres reforza en Madrid a súa figura de líder dialogante alonxado da crispación; capaz, iso si, de eloxiar o goberno de Sánchez e acusalo de agachar os mortos reais da pandemia, case na misma frase. 

Nisto Feijóo conqueriu tamén facer outro gran xogo de mans, facendo que se esqueza o político que lideraba a oposición ao goberno de Touriño e Quintana. E é que Feijóo non foi sempre presidente da Xunta.

Houbo un tempo no que encabezou unha oposición sen cuartel, permitindo o xogo sucio e os ataques persoais nos que chegaron a acusar a Touriño de tendencia enfermiza polo luxo e a Quintana de corrupto. "A crispación non ten sustento social", dixo hai uns días. Salvo que me conveña a min, puido engadir. 

Feijóo preséntase tamén como o antídoto contra Vox, pero habería que ver que faría se o 12 de xullo, necesitara un escano da extrema dereita para seguir gobernando: había de ser Merkel ou Ayuso? Como non parece que vaia a ocorrer, quedarémonos coa dúbida.

Imitar os trucos do mestre Houdini non foi nunca doado; mesmo un mago hindú chamado Mandrake morreu no intento o ano pasado. Afogouse. De momento, Feijóo parece ter varias vidas políticas e o pano está a piques de erguerse de novo. A función vai comezar.

Muy Bien, has hecho Like

¿Qué tipo de error has visto?
¿La sugerencia que quieres realizar no está entre estas opciones? Puedes realizar otro tipo de consultas en eldiario.es responde.
Error ortográfico o gramatical Dato erróneo

¡Muchas gracias por tu ayuda!
El equipo de redacción de eldiario.es revisará el texto teniendo en cuenta tu reporte.

Comentar

Enviar comentario

Comentar

Comentarios

Ordenar por: Relevancia | Fecha