'Los Santos Inocentes' chegan a Santiago, DhakaBrakha trae punk ucraíno á Coruña e Drexler fai parada en Ferrol

Remata unha semana de treboadas e comeza outra na que agardamos mellor tempo e temos boas propostas culturais para entreternos. En Santiago, por exemplo, esta fin de semana terás a oportunidade de ver a versión teatral de Los Santos Inocentes de Miguel Delibes, unha obra que xa foi unha obra mestra literaria e que logo se converteu tamén nunha xoia cinematográfica. Seguindo cos espectáculos teatrais, o Pazo de Cultura de Pontevedra recibe ao actor Alberto San Juan coa súa produción en formato monólogo e Luis Zahera continúa coa xira de Chungo, que nesta ocasión ten unha cita o sábado 21 no Teatro Colón da Coruña. .

Na música reactivan as cousas despois do parón de Nadal e temos concertos importantes como a chegada a Ferrol da xira de Jorge Drexler co seu último disco, Tinta y tiempo, a presenza de Sés en Ourense ou a actuación conxunta de Mafalda e Tremenda Jauría en Santiago, que promete emocións fortes. Tamén será moi emocionante ver ao ucraíno DhakaBrakha este venres día 20 na Coruña. Nos museos pódese refuxiar estes días de inverno e ver exposicións como a dedicada ao artista Silverio Rivas no Museo Municipal de Pontevedra. Sen dúbida é un dos creadores galegos máis destacados das últimas décadas e sempre paga a pena repasar as súas esculturas.

Delibes feito teatro en Los Santos Inocentes. Auditorio de Galicia. Santiago. Sábado 21 de xaneiro

A novela inmortal de Miguel Delibes, convertida despois nun filme maxistral, chega agora a Santiago na súa versión teatral cun elenco liderado polo galego Javier Gutiérrez. Fernando Marías e Javier Hernández Simón son os autores dunha adaptación teatral que tenta reflectir todo o poder do texto de Delibes. Máis info e entradas.

Jorge Drexler canta en Ferrol. Auditorio Municipal, sábado 21 de xaneiro

A xira mundial de Jorge Drexler para en Ferrol para ofrecer un concerto máis íntimo coa presentación de Tinta y tiempo, o seu último disco. Drexler é un dos cantautores latinoamericanos máis seguidos dos últimos tempos e os seus concertos son o seu mellor medio de expresión ante o público. Entradas.

DhakaBrakha de Ucraína. Teatro Colón A Coruña. Venres 20 de xaneiro

O grupo ucraíno actúa este venres na Coruña co seu espectáculo punk-folk que agora busca acalar os ventos da guerra que sopran no seu país. Antes da guerra eran un dos grupos máis coñecidos do seu país e actuaron en festivais internacionais de todo o mundo. Música salvaxe para loitar na guerra máis sanguenta. Entradas.

Retrospectiva de Silverio Rivas. Museo Municipal de Pontevedra. Ata o 5 de febreiro

“Eloxio do Silencio” é o título da mostra que o Museo de Pontevedra dedica ao gran artista ponteareán, unha das figuras esenciais da escultura galega contemporánea. A exposición fai un percorrido pola súa obra desde os primeiros tempos da abstracción ata a actualidade. Unha cita imprescindible para achegarse a un dos grandes artistas galegos da actualidade. Máis info.

Outras propostas

Zahera no Colón: a xira de Chungo para este sábado 21 no Teatro Colón da Coruña, co actor e humorista facendo gala de todo o seu talento. Entradas.

Alberto San Juan en Pontevedra: Nueva York en un poeta é o espectáculo protagonizado polo actor madrileño, baseado nas vivencias de Lorca nesa cidade. Música, teatro e poesía combínanse na montaxe. Poderase ver este sábado no Pazo de Cultura de Pontevedra. Entradas.

Mafalda e Tremenda Jauría: ámbolos dous grupos unen as súas forzas, que son moitas, nunha xira conxunta que chega á sala Capitol de Santiago este venres 20 mestúranse actitudes punk e ritmos latinos nun concerto pensado para converterse nun espallamento de enerxía sen concesións. Aquí entradas.

Sés en Ourense: tamén na noite do sábado 21 Sés presenta o seu disco Diante un eco no Auditorio Municipal de Ourense. Aquí entradas.

N.E.V.E.R.M.O.R.E. en Bertamiráns: a visión do Chévere do accidente do Prestige chega este venres á Casa da Cultura de Bertamiráns. Entradas.