Mirar al futuru

Cuando esti vienres se celebre nel Teatru Campoamor d’Uviéu l’actu con motivu del Día de les Lletres Asturianes faltará namás una selmana pal entamu oficial de la campaña electoral y malapenes tres selmanes pa les elecciones autonómiques. El viniente 28 de mayu los asturianos y les asturianes van volver votar a los sos representantes na Xunta Xeneral. Y nuevamente, los partíos que sofiten la oficialidá van ser mayoría.

La llexislatura qu’agora acaba nun foi cenciella. Cuando naide lo esperaba, una pandemia zarrónos en casa y alterió l’axenda política. Magar que dende l’entamu de la democracia nunca hubo na Xunta Xeneral tantos diputaos y partíos favoratibles a la oficialidá, l’alcuerdu pa sacar alantre la reforma del Estatutu d’Automonía que reconociere l’asturianu y l’eonaviego l’estatus llegal que mandata la Constitución Española nel so artículu 3.2 nun foi posible.

La incapacidá de los partíos pa sacar alantre les negociaciones fizo encallar esa posibilidá cuasi qu’enantes d’entamar dexando nel movimientu de reivindicación llingüística un sentimiento de frustración qu’entovía perdura. Pero más allá de les miraes al pasáu, lo qu’agora toca ye falar del futuru. La llexislatura que va entamar tien de ser la oficialidá con un modelu propiu adaptáu a la realidá sociollingüística d’Asturies. Y al tiempu, toca poner les blimes pa qu’esi modelu seya esitosu.

Asturies rique d’una política llingüística que normalice les nuestres llingües y asegure las tresmisión xeneracional. El Gobiernu del Principáu d’Asturies habría trabajar a camuña, de forma tresversal, nuna acción conxunta que llegue a toles estayes de l’alministración autonómica. Pa ello, ye necesario ellaborar un Plan de Normalización que permita planificar les midíes a desendolcar a cortu, mediu y llargu plazu con una bayura de parámetros que permitan facer seguimientu del grau de cumplimientu del mesmu. El muérganu pa facer esi siguimientu habría ser un remocicáu Conseyu Asesor, con representación de les entidaes y asociaciones que trabayen pola normalización del asturianu y l’eonaviego.

Pero si hai dos ámbitos fundamentales pal trabayu na normalización social de les nuestres llingües son la educación y los medios públicos de comunicación. El Gobiernu del Principáu ha garantizar ensin escepciones la ufierta de les asignatures de Llingua Asturiana y Eonaviego en tolos centros y en toles etapes educatives, tal como establez la Llei d’Usu. Cada añu al entamar el cursu académicu son frecuentes les denuncies de families poles torgues a la hora de matricular a los sos fíos y fíes nestes materies. N’otros casos, como nel IES Cristo del Socorro de Lluanco y nel colexu Aniceto Sela de Mieres nin siquiera tienen profesor pa impartir la materia, lo que perxudica la matrícula na asignatura nos cursos siguientes. Tampoco ayuda la situación de precariedá del profesoráu, que sigue esperando pola aprobación de la especialidá docente pa poder tener estabilidá.

Los medios de comunicación públicos han ser otru pegoyu de les polítiques de normalización. Tal y como señalaron los responsables de la política llingüística de la Comunidá Valenciana, Galicia y el País Vascu nel últimu seminariu ‘Oficialidá, el Camín constitucional de futuru pal asturianu’ entamáu por iniciativa pol Asturianu a finales del mes pasáu nel edificiu históricu de la Universidá d’Uviéu, la televisión autonómica foi fundamental nesti procesu. Un papel que la Radiotelevisión del Principáu d’Asturies nun ta xugando anguaño. L’asturianu tien una presencia testimonial na programación de la radio y televisión públiques y circunscrita siempres a la cultura y l’entretenimientu.

L'últimu presupuestu aprobáu pol Gobiernu del Principáu incorpora’l mandatu de “la normalización de la llingua asturiana, entendida esa normalización como l’usu del asturiano en condiciones de normalidá”, cuando la llexislación precedente fala namás de la so visibilización. Sicasí, la Xunta Xeneral sigue ensin aprobar el mandatu-marcu, documentu nel qu’habríen fixase los oxetivos xenerales de la RTPA pa un periodu de ocho años y qu’habría recoyer necesariamente una presencia del asturianu equiparable a la del castellanu.

Queda munchu trabayu per delantre. El 28 de mayu ha ser l’entamu d’una política llingüística ambiciosa que nos conduza a una reforma del Estatutu que reconoza la oficialidá del asturianu y l’eonaviego qu’establez la Constitución. Ye’l momentu de mirar al futuru, ye’l momento de la oficialidá.